маконе, ки бизнес рушд мекунад
Cанаи 20 июли соли 2024 бо мақсади ободу зебо гардонидан ва тозаву озода нигоҳ доштани ҳудуду биноҳои МОИ “СУҒД” шанбегии дастаҷамъона баргузор гардид, ки дар он кормандони Маъмурияти МОИ “Суғд”, роҳбару намояндагони субъектҳои МОИ “СУҒД” фаъолона иштирок намуда, барои ободонӣ ва тоза нигоҳ доштани ҳудуд ҳар як иштирокчии шанбегӣ саҳми худро гузоштанд.
Санаи 19 июли соли 2024 дар бинои Маъмурияти МОИ “СУҒД” ҷаласаи корӣ оид ба натиҷаҳои фаъолияти нимсолаи якуми соли 2024, таҳлили вазъи воқеӣ, баррасии мушкилотҳои ҷойдошта, ва вазифагузориҳо барои нимсолаи дуюм баргузор гардид.
Дар ҷаласаи корӣ роҳбарону намояндагони субъектони МОИ “Суғд” иштирок намуда, дар рафти ҷаласа оид ба муамоҳои мавҷуда сухан карда, инчунин фикру пешниҳодҳои иштирокдорони ҷаласа оид ба ҳалу фасли он шунида шудаанд.
Дар хотимаи ҷаласа Роҳбари Маъмурият Муҳаммадзода Муҳаммад Султон иброз намуд, ки барои ҳалу фасли муамоҳову масъалаҳои дар рафти ҷаласа қайдгардида Маъмурият ва шӯъбаҳои дахлдор бо сохторҳои вобаста ҳамкорӣ намуда, кӯшиш менамояд, ки барои бартараф намудани он корбарӣ менамояд.
Маълумоти бештар
Ба муносибати Иди саиди Қурбон ва дар остонаи 27-умин солгарди Рӯзи ваҳдати миллӣ намояндагони Мақомоти иҷроияи ҳокимияти шаҳри Исфара бо роҳбари Маъмарияти МОИ «Суғд» Муҳаммадзода Муҳаммад Султон ба Қисми ҳарбии 02267 “А” Вазорати мудофиаи Ҷумҳурии Тоҷикистон, Қисми ҳарбии 0215 РҚС ҚС КДАМ Ҷумҳурии Тоҷикистон ва Шуъбаи таъиноти махсуси ҚС КДАМ Ҷумҳурии Тоҷикистон дар вилоят, “Чоркӯҳ” ҷиҳати аёдати сарбозон ташриф оварда, ҳайати шахсии ҷузъу томҳои дар шаҳри Исфара амалкунандаи Қувваҳои мусаллаҳ ва Қӯшунҳои сарҳадии мамлакатро аз номи Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи Ҷумҳурии Тоҷикистон, Генерали Артиш муҳтарам Эмомалӣ Раҳмон ва Раиси вилояти Суғд Раҷҷаббой Аҳмадзода табрик намуданд.
Муҳаммадзода Муҳамад Султон дар суҳбат бо афсарон ва сарбозон изҳор дошт, ки бо дастгириҳои пайвастаи Пешвои миллат муҳтарам Эмомалӣ Раҳмон шароити будубош дар қисмҳои низомӣ сол аз сол беҳтар гардида, ҷавобан ба ин ғамхориҳо нақши афсарону сарбозон дар ҳимояи марзу буми кишвар, пойдории ваҳдати миллӣ ва суботу оромӣ басо назаррас мебошад.
Дар идомаи аёдат барои сарбозону афсарон дар қисмҳои низомӣ дастурхони пурфайзи идона ороста шуда, маводи ғизоӣ дастрас карда шуд.
Дар ин рӯзҳо, X-умин Намоишгоҳи байналмилалии савдо «Суғд-2024» бо иштироки меҳмонони сершумор, аз ҷумла ниҳодҳои дипломатии Россия, кишварҳои ҳамсоя ва хориҷи наздик, намояндагони палатахои савдо ва саноати як қатор вилоятҳои Россия, Осиёи Марказӣ ва дигар кишварҳо дар шаҳри қадимаи Хуҷанди Вилояти Суғд идома дорад.
Дар кори Намоишгоҳ, дар қатори ширкатҳои зиёди ширкаткунанда Маъмурият ва якчанд субъектҳои бомуваффақияти Минтақаи озоди иқтисодии «Суғд» фаъолона ширкат варзида, маҳсулоти худро бо тамғаи ватанӣ ва сифати баланд ба намоиш гузоштанд.
Имрӯз рӯзи охирини Намоишгоҳ аст. Дар нимаи дуюми рӯз ба имзо расонидани ёддошти тафоҳум, созишномаҳо ва шартномаҳо оид ба ҳамкорӣ байни иштирокчиёни Намоишгоҳ пешбинӣ шудааст.
Роҳбари Маъмурияти МОИ «Суғд» Муҳаммадзода Муҳаммад Султон ва муовини раиси вилояти Суғд Анвар Яъқубӣ дар Ҷумҳурии Беларус бо сафари корӣ қарор доранд. Мақсади сафар – иштирок дар Намоишгоҳи ҳамасолаи агросаноатии «БЕЛАГРО-2024» мебошад, ки аз ҷониби ташкилкунанадагони чорабинӣ даъват шудаанд.
4 июн, Муҳаммадзода Муҳаммад Султон ва Анвар Яъқубӣ аз МОИ “Минск” дидан карданд. Меҳмононро роҳбари Маъмурияти МОИ “Минск” Анатолий Анатолевич Бубен ва чонишини якуми ӯ Сергей Викторович Бубенко қабул карданд. Ҷонибҳо дурнамои ҳамкориҳои минбаъдаро дар самти табодули иттилоот оид ба муаррифии фаъолияти ҳарду МОИ ва дарёфти имкониятҳо барои ба ҳам овардани соҳибкорони тоҷику белорус бо ҳадафи таъсиси корхонаҳои муштараки истеҳсолиро дар ҳарду кишвар баррасӣ карданд. Пас аз вохӯрӣ бо роҳбарият, меҳмонон аз чанд субъекти МОИ “Минск” дидан намуда, бо фаъолият ва маҳсулоти онҳо шинос шуданд. Масъалаҳои роҳандозии содирот ё истеҳсоли молҳои серталаб бо сифати белорусӣ дар вилояти Суғд, аз ҷумла дар ҳудуди МОИ “Суғд” баррасӣ карда шуданд. Қобили зикр аст, ки нахустин санади ҳамкорӣ (Ёддошти тафоҳум) миёни ҳарду минтақаи озод, 16 ноябри соли 2016 дар шаҳри Хуҷанд ба имзо расида, моҳи сентябри соли 2023 ҷонибҳо бо имзои Созишномаи ҳамкорӣ дар чаҳорчӯби Анҷумани Беларусу Тоҷикистон, ки дар шаҳри Душанбе барпо гардида буд, шарикии худро таҳким бахшиданд.
29-уми майи соли ҷорӣ, як гурӯҳ донишҷӯёни бахши иқтисодӣ ва омӯзгорони Донишгоҳи Осиёи Марказӣ, ки дар шаҳри Хоруғи ВМКБ воқеъ аст, ба МОИ «Суғд» ташриф оварданд.
Мақсад аз ташриф боздид ва шиносоӣ бо фаъолияти яке аз минтақаҳои озоди рушдкарадаи Ҷумҳурии Тоҷикистон мебошад.
Меҳмонон дар рафти боздид, ба якчанд субъектҳои МОИ, аз ҷумла ба Донишкадаи саноат ва хизматрасонӣ, ҶДММ «Азияполитекс», ҶДММ КМ ТТ «Арча-мебел» ва ҶДММ КМ ТТ «Фортуна-Ко» ташриф оварда, аз фаъолият ва молу маҳсулоти истеҳсолшаванда шинос гардианд.
Дар рафти шиносоӣ, роҳбарияти субъектҳои мазкур ба меҳмонон тамоми маълумоти заруриро пешниҳод намуданд. Донишҷӯён зимни боздид ба фаъолияти субъектҳо рағбати калон зоҳир карда, ба маҳсулоти онҳо баҳои баланд доданд. Ҳама лаҳзаҳои ҷолиби шиносоӣ бо аксҳои хотирмон сабт гардиданд.
Дар фарҷоми ташриф донишҷӯён ва ҳайати омӯзгорони ҳамроҳи онҳо ба роҳбарияти Маъмурияти МОИ «Суғд» ва субъектҳои он барои чунин имконият миннатдорӣ намуда, хоҳиши худро ҷиҳати идомаи ҳамкориҳои минбаъда дар тарбияи мутахассисони оянда изҳор намуданд.
Маълумоти бештар
28 майи соли 2024 Маъмурияти МОИ “Суғд” маросими супоридани Тасдиқномаи мақоми субъекти МОИ “Суғд” ба корхонаи навтаъсиси ҶДММ “Корхонаи муштараки Ривер Суғд Фарм”, ки бо истеҳсоли доруворӣ машғул мешавад, баргузор гардид.
Тасдиқнома расман ва ботантана аз ҷониби Роҳбари Маъмурияти МОИ “Суғд” Муҳаммадзода Муҳаммад Султон ба директори корхонаи мазкур Ҷаборов Пӯлот Юсуфович супорида шуд.
Бояд қайд намуд, ки лоиҳаи сармоягузории корхонаи мазкур аз 3 то 5 млн доллари ИМА-ро ташкил дода, аз ҳисоби сармоягузорони Ӯзбекистон 71,4% ва аз ҳисоби сармоягузорони ватанӣ 28,6% ҳиссаро ташкил медиҳад.
Дар доираи лоиҳа баъди ба кор андохтани корхонаи нави истеҳсолӣ маҳсулоти дорусозӣ ва доруворӣ бо иқтидори 20 000 000 адад дар як сол ба роҳ монда мешавад.
Нархи рақобатпазири маҳсулоти тайёр дар оянда имкон медиҳад, ки на танҳо бозори дохилиро таъмин намояд, балки ба кишварҳои ҳамҷавор содирот намояд.
Маълумоти бештар
Анҷумани байналмилалии иқтисодӣ, ки дар шаҳри Қошғари вилояти мухтори Синзиян Уйғури Ҷумҳурии Мардумии Чин ба кори худ оғоз карда буд, рӯзи 20 май ба поён расид. Нуқтаи охирини ташрифи ҳайати вакилони Тоҷикистон шаҳрҳои Линӣ ва Чиндао буданд.
Рӯзи 20 май дар Ассотсиатсияи соҳибкорони шаҳри Чиндао, музофоти Шандун, ки бо соҳибкорони олмонӣ ҳамкории зич дорад, вохӯрӣ ташкил карда шуд.
Зимни мулоқот ҷонибҳо хоҳиши ба роҳ мондани ҳамкориҳоро изҳор намуданд. Роҳбари Маъмурияти МОИ «Суғд» – Муҳаммадзода Муҳаммад Султон оид ба минтақа суханронӣ намуда, ба ҳама саволҳои ҳозирин посух дод. Дар фарҷоми суханронӣ ӯ аз роҳбар ва аъзоёни Ассотсиатсияро ба Намоишгоҳи байналмилалии «Суғд-2024», ки моҳи июни соли ҷорӣ дар шаҳри Хуҷанд баргузор мегардад, ҷиҳати иштирок даъват намуд, ки дар рафти чорабинии мазкур боздид ва шиносоӣ аз шароиту имкониятҳои МОИ «Суғд» имконпазир аст. Роҳбари Ассотсиатсия барои даъват изҳори сипос намуда, ба омӯзиши масъалаи роҳандозии ҳамкорӣ ва дидад баромадани имконияти сафар ба Хуҷандро ваъда намуд. Пас аз вохӯрӣ, меҳмонон аз толори намоишии мошинҳои сабукрави воридотӣ, бахусус мошинҳои боҳашамат ва гаронбаҳои Олмон, ки узви Ассотсиатсияи соҳибкорони Чиндао мебошад, дидан намуданд.
Дар рафти шиносоӣ ва вохӯрӣ бо рохбарияти толор меҳмонон бо нозукиҳо ва хусусиятҳои тиҷорати мошинҳои хориҷӣ дар Ҷумҳурии Мардумии Чин ошно гардиданд. Бо ҳамин, тибқи барномаи Анҷуман, сафари кории Роҳбари Маъмурияти МОИ «Суғд» дар баробари дигар аъзоёни ҳайати Тоҷикистон дар Чин анҷом ёфт. Бояд қайд намуд, ки иштирок дар Анҷуман бо таассурот ва ёддоштҳои бузург, созишномаҳои хуб ба роҳ мондашуда ва робитаҳои нави корӣ бо ширкатҳо ва доираҳои тиҷоратии чинӣ хеле пурсамар буд.
Чи тавре, ки қаблан иттилоъ дода шуда буд, дар Ҷумҳурии Мардумии Чин Анҷумани байналмилалии иқтисодӣ баргузор гардид, ки дар он Роҳбари Маъмурияти МОИ «Суғд» Муҳаммадзода Муҳаммад Султон дар қатори ҳайати Тоҷикистон ширкат дошт.
Рӯзи 18 май тибқи барномаи Анҷуман ҳайати Тоҷикистон кори худро дар шаҳрҳои Лини ва Чиндаои музофоти Шандун идома дод.
Дар шаҳри Лини бо шахсони расмӣ, инчунин бо роҳбарони якчанд ширкатҳои маҳаллӣ вохӯриҳо ташкил карда шуданд. Яке аз чунин гуфтушунидҳо дар Комитети мунисипалии Линии шӯрои чинӣ оид ба мусоидат ба савдои байналхалкӣ барпо гардид, ки дар он ҷонибҳо имкониятҳо ва пешомадҳои муқаррар намудани ҳамкориро муҳокима карданд. Муҳаммадзода Муҳаммад Султон дар бораи имкониятҳо ва бартариҳои МОИ, аз ҷумла дар бораи вазъи мусоиди ҳуқуқӣ ва имтиёзҳои андозбандӣ ба субъектҳои МОИ маълумот дод, ки писанди ҷониби Чин гардида, хоҳиши амиқтар ва муфассалтар омӯхтани фаъолияти МОИ «Суғд» изҳор карда шуд. Ҷонибҳо ҷиҳати таҳкими натиҷаи гуфтушунидҳои пешакӣ байни Маъмурияти МОИ «Суғд» ва Кумитаи Мунисипалии Линии Шӯрои Чин оид ба мусоидат ба савдои байналмилалӣ Ёддошти тафоҳум бастанд.Баъд аз он, меҳмонон ба як қатор корхонаҳо, аз ҷумла ба порки намоишии корхонаи тавлидкунандаи мошинҳои боркаш, ки якчоя бо ширкати маъруфи Волво (Vоlvо) ба истеҳсолот машғул аст, ташриф оварда, аз маҳсули мошинҳои калонҳаҷми боркаш дидан карданд. Муҳаммадзода Муҳаммад Султон зимни мулоқот бо роҳбарияти корхона дар бораи лоиҳаи сохтмони маркази логистикии МОИ «Суғд» ва имконоти ташкили маркази хизматрасонии мошинҳои боркаш дар он суханронӣ намуд. Роҳбарияти корхонаи мазкур ба ин лоиҳа таваҷҷуҳи махсус зоҳир намуда, хоҳиши худро ҷиҳати омӯзиши муфассали лоиҳа ва имкониятҳои ширкат дар лоиҳаро изҳор намуд.
Чи тавре, ки қаблан иттилоъ дода шуда буд, Роҳбари Маъмурияти МОИ «Суғд» Муҳаммадзода Муҳаммад Султон бо сафари корӣ дар Ҷумҳурии Мардумии Чин ҷиҳати иштирок дар Форума байналмилалии иқтисодӣ бо даъвати ҷониби Чин қарор дорад.
Рӯзи 16 май тибқи барномаи Форум иштирокчиён дар Намоишгоҳи сохтмон ва саноат дар Маркази намоишгоҳи байналмилалии Синзян ширкат карданд, ки дар он маҳсулоти ширкатҳои сохтмонию саноатии маҳаллӣ ба намоиш гузошта шуда буд.
Дар маросими ифтитоҳи намоишгоҳ Муҳаммадзода Муҳаммад Султон бо маърӯза оид ба фаъолияти МОИ «Суғд» суханронӣ намуд. Роҳбари Маъмурияти МОИ дар оғози суханронӣ нақши барҷастаи Чинро дар рушди иқтисоди Тоҷикистон, равобити қавии тиҷории тоҷирони тоҷику Чин ва муносибатҳои кори ва дӯстонаи ду кишварро баланд арзёбӣ намуд. Сипас дар бораи фаъолият ва бартариҳои МОИ, аз ҷумла дар бораи шароити мусоиди иқтисодӣ, низоми махсуси ҳуқуқӣ ва имтиёзҳои андозӣ, ки ба субъектҳои МОИ пешбинӣ шуданд, маълумот дод. Ӯ махсусан қайд намуд, ки дар МОИ «Суғд» беш аз сӣ ширкати маҳаллӣ ва муштарак, аз ҷумла бо иштироки сармояи чинӣ бомуваффақият фаъолият мекунанд. Дар фарҷоми муаррифӣ филми мухтасари муаррифӣ оид ба фаъолияти МОИ намоиш дода шуд.
Бояд қайд намуд, ки дар маросими ифтитоӣ боз як баромади дигари муаррифӣ оид ба фазои мусоиди тиҷории Ҷумҳурии Тоҷикистон аз ҷониби намояндаи Палатаи савдо ва саноати Чумҳурии Тоҷикистон Ҷумъаев Муҳаммадҷон дар Ҷумҳурии Мардумии Чин баргузор гардид.
Баъд аз маросими кушодашавӣ иштирокчиён аз молу маҳсулоти ба намоиш гузошташуда дидан намуда, аз комёбиҳои корхонаҳои саноатию бинокории Хитой шинос шуданд. Роҳбари МОИ «Суғд» зимни шиносоӣ бо роҳбарият ва намояндагони ин ширкатҳо оид ба роҳандозии ҳамкорӣ, ташкили ширкатҳои саноатии муштарак дар ҳудуди МОИ ва тавассути истифодабарии афзалиятҳои МОИ «Суғд» истеҳсоли маҳсулоти сифатнок ва мавриди ниёзи бозорҳои Точикистон ва Осиёи Миёна гуфтушунид намуд.
Ҳайати Тоҷикистон мувофиқи барномаи Форум кори худро дар шаҳрҳои Чиндао ва Линии музофоти Шандун идома медиҳад.
