8 июли соли 2026 Вазири рушди иқтисод ва савдо Абдураҳмонзода Абдураҳмон Сафаралӣ зимни сафари корӣ ба вилояти Суғд аз корхонаҳои ифтитоҳшуда дар Минтақаи озоди иқтисодии “Суғд”, аз ҷумла аз ҶДММ “Суғд Агро Трейд”, ҶДММ “Синтай Метал Суғд” ва ҶДММ “Сомон Кейс” дидан намуд.

Зимни боздид аз корхонаҳои мазкур ва мулоқот бо роҳбарону намояндагони онҳо Вазири рушди иқтисод ва савдо қайд кард, ки бо дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар минтақаҳои озоди иқтисодии кишвар тамоми шароитҳо ба соҳибкорону сармоягузорони дохилию хориҷӣ барои таъсиси корхонаҳои истеҳсолӣ фароҳам оварда шудааст.

Корхонаҳои қайдгардида ба истеҳсол, коркард ва банду басти инноватсионии молу маҳсулоти воридотивазкунанда ва ба содирот нигаронидашуда машғул буда, зиёда аз 180 чойҳои нави кориро таъсис доданд.

Аз ҷумла ҶДММ “Суғд Агро Трейд” самти фаъолияташ истеҳсол, коркард ва банду басти инноватсионии биринҷ буда, имконият дорад, ки дар як сол то 30 ҳазор тонна биринҷро коркард намояд.

ҶДММ “Синтай Метал Суғд” бошад ба коркарди дуюмдараҷаи хокаи кимиёвӣ машғул буда, имконияти коркарди 3000 тонна марганетс ва сурмаро дар як сол дорад.

Инчунин самти фаъолияти ҶДММ “Сомон Кейс” истеҳсоли чувздони мактабӣ буда, то 3000 дона ҷувздонро дар як моҳ истеҳсол менамояд.

 

 

 

 

 

8 июл Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар Минтақаи озоди иқтисодии Суғд марҳилаи дуюми Ҷамъияти дорои масъулияти маҳдуди «Сайри Суғд»-ро мавриди истифода қарор доданд.

Самти фаъолияти ҷамъият асосан ба истеҳсоли мошинҳои хурди барқии боркашонӣ, дучарха ва истеҳсоли 18 намуд бозичаи кӯдакона равона гардидааст.

Зимни шиносоӣ ба Пешвои миллат муҳтарам Эмомалӣ Раҳмон иттилоъ доданд, ки иншоот дар доираи омодагӣ ба истиқболи ҷашни 35-солагии Истиқлоли давлатӣ бо ҳадафи рушди саноат ва истеҳсоли маҳсулоти ивакунандаи воридот аз ҷониби бародарон Умаровҳо сохта шудааст.

Дар корхонаи тозабунёд дар як моҳ бо ҷалби зиёда аз 100 коргари маҳаллӣ 35 намуди маҳсулот, аз ҷумла 250 мошини хурди барқӣ, 15 ҳазор дучарха ва 30 ҳазор бозичаҳои гуногун истеҳсол карда мешавад, ки 70 фоизи маҳсулоти тайёри корхона ба хориҷи кишвар содирот мегардад.

Биноҳои асосӣ ва коргоҳҳои механикӣ, кафшергарӣ, банду баст ва рангу бор, ки дар масоҳати 12 ҳазору 500 метри мураббаъ бунёд ёфтааст, бо занҷираи ягонаи истеҳсолӣ ва дастгоҳу технологияи насли нав пайваст карда шуда, он то анҷоми корҳои истеҳсолӣ ба таври автоматӣ ба ҳаракат меояд.

Ҷорӣ кардани усули нави техникӣ кори дастиро то 90 фоиз коҳиш додааст.

Ёдовар мешавем, ки 19 ноябри соли 2024 Президенти кишвар муҳтарам Эмомалӣ Раҳмон зимни ифтитоҳи марҳилаи аввали корхонаи «Сайри Суғд» ба муассиси корхона тавсия дода буданд, ки дар ҳамин мавзеъ барои қонеъсозии талаботи мардум корхонаи истеҳсоли мошинҳои хурди барқиро бунёд намоянд.

Аз ин хотир соҳибкор Мирзо Умаров дар Минтақаи озоди иқтисодии Суғд бо истифода аз имтиёзу сабукиҳои андозиву гумрукӣ технологияи муосирро аз хориҷи кишвар ворид карда, истеҳсоли мошинҳои хурди барқиро бо бренди Сайр моторс ба роҳ монд.

Мошинҳои хурди барқии истеҳсоли Тоҷикистон метавонад бо як маротиба пур кардани барқ 100 километр масофа ҳаракат кунад.

Ин мошинҳо бо борбардории бештар аз 1 тонна ва ду ҷойи нишаст мувофиқи дархости мардум бо сақфи кушода ва пушида истеҳсол карда мешаванд.

Ҳоло истеҳсоли қариб тамоми қисмҳои дучарха дар дохили корхона ба роҳ монда шудааст ва танҳо 3 намуди лавозимот аз хориҷи кишвар воридот мегардад, ки ин аз дараҷаи баланди кордонии мутахассисони тоҷик ва истифодаи дурусти технологияи муосир шаҳодат медиҳад.

Манфиати дигари истифодаи технологияи нав то 10 маротиба кам кардани кори дастӣ дар ҳамвазнсозии (балансировка) чархҳо мебошад.

Масъулини корхона оянда нақша доранд, ки дар доираи фазои мусоиди соҳибкориву сармоягузорӣ ҳаҷми истеҳсол ва содироти маҳсулоти корхонаро афзоиш диҳанд ва дар амалисозии ҳадафи чоруми стратегӣ – саноатикунонии босуръат саҳми арзанда гузоранд.

Сарвари давлат иқдоми муассиси корхонаро дар бунёди чунин иншооти саноатӣ, таъмини сокинон бо кори доимӣ ва саҳмгузорӣ дар рушди истеҳсоли ватанӣ муҳим арзёбӣ карда, ба масъулон супориш доданд, ки барои ҷалби сармоягузорӣ дар Минтақаи озоди иқтисодии Суғд ва бунёди иншооти нав чораҳои иловагӣ андешанд.

Минтақаи озоди иқтисодии Суғд соли 2008 бо иқдоми Президенти Ҷумҳурии Тоҷикистон муҳтарам Эмомалӣ Раҳмон таъсис ёфта, дар давоми 17 соли охири фаъолият дар он бо ҷалби сармоягузорони дохиливу хориҷӣ 27 иншооти саноативу хизматрасонӣ сохта ба истифода дода шудааст ва ҳоло дар 25 субъекти дигар корҳои лоиҳакашӣ ва озмоишӣ идома дорад.

Соли 2026 дар минтақа 5 субъекти нав бо таъсиси 300 ҷойи кории нав ба қайд гирифта шудааст, ки самти фаъолияти онҳо асосан истеҳсоли маҳсулоти саноатӣ ва хизматрасонӣ мебошад.

 

 

 

 

Санаи 2-юми июли соли 2026 дар Маъмурияти МОИ “Суғд” субъекти нав бо номи ҶДММ “Осмони Орзуҳои Суғд” ба қайд гирифта шуд, ки Роҳбари Маъмурияти МОИ “Суғд” Муҳаммадзода Муҳаммад Султон дар фазои тантанавӣ Тасдиқномаи субъекти МОИ “Суғд”-ро ба роҳбари корхонаи мазкур Қурбонов Фирӯз Маҳмадалиевич супориданд.

Корхонаи мазкур аз ҷониби сармоягузори Ҷумҳурии мардумии Чин хонум Менг Мин таъсис дода мешавад. Самти фаъолияти корхона ба истеҳсоли батареяҳо барои дучарха ва сечархаҳои барқӣ равона гардидааст, ки ба ин намуди мол имрузҳо дар бозор талабот бештар мебошад.

Тадбиқи лоиҳаи мазкур дар оянда ба рушди истеҳсоли МОИ “Суғд”, таъсиси ҷойҳои нави корӣ ва афзоиши истеҳсоли маҳсулоти воридотивазкунанда мусоидат менамояд.

Сипас, Роҳбари Маъмурияти МОИ “Суғд” Муҳаммадзода Муҳаммад Султон ба роҳбари корхонаи мазкур барору комёбӣ таманно намуда, вобаста аз имкониятҳои мавҷуда баҳри тезонидани корҳои сохтмонӣ дастуру супоришҳо доданд.

 

 

18 июни соли 2026 дар доираи Намоишгоҳи байналмилалии савдо «Суғд-2026» Дафтари барномавии САҲА дар Душанбе чорабинии ҳамзамонро таҳти унвони «Аз МОИ то содироти онлайн» баргузор намуд, ки ба омӯзиши роҳҳои амалии густариши фаъолияти соҳибкории таҳти роҳбарии занон тавассути тиҷорати электронии фаромарзӣ бахшида шуда буд.

Дар ҷаласаи панелӣ намояндагони соҳибкорӣ аз кишварҳои Қазоқистон, Қирғизистон ва Тоҷикистон, инчунин намояндагони Маъмурияти МОИ «Суғд» ва занони соҳибкоре, ки фаъолияти худро дар ҳудуди МОИ «Суғд» ба роҳ мондаанд, иштирок ва суханронӣ намуданд.

Қаюмова М., сардори шуъбаи муносибатҳои байналмилалӣ ва ҷалби сармоягузории Маъмурияти МОИ «Суғд», ҳамчун намояндаи Минтақаи озоди иқтисодии «Суғд» зимни суханронии худ қайд намуд, ки МОИ танҳо ҳудудҳои дорои имтиёзҳо нестанд, балки платформаҳои омода барои воридшавии бемамониат ба бозорҳои байналмилалӣ мебошанд. Ӯ ҳамчунин зикр кард, ки рушди соҳибкории таҳти роҳбарии занон тавассути тиҷорати электронии фаромарзӣ имрӯз ба яке аз масъалаҳои мубрам табдил ёфта, фурӯши маҳсулот тавассути маркетплейсҳо имкониятҳои бештарро барои пешбурди фаъолияти тиҷоратӣ фароҳам меорад.

Ҳамчунин дар ҷаласаи панелӣ Файзуллоева Ш. бо муаррифии муфассал оид ба имтиёзҳо ва афзалиятҳои пешниҳоднамудаи Маъмурияти МОИ «Суғд» баромад намуд.

Инчунин роҳбари ҶДММ «Донаи Алмос» Хазратзода О. рӯнамоии муфассалро оид ба фаъолияти кунунӣ ва дурнамои рушди корхона пешниҳод намуд.

Бо дастгирии занони соҳибкор тавассути дониш, робитаҳои корӣ ва дастрасӣ ба имкониятҳои тиҷорати рақамӣ, САҲА ба таҳкими ҳуқуқу имкониятҳои иқтисодии занон ва рушди ҳамкориҳои иқтисодии минтақавӣ мусоидат намуд.

 

 

 

19 июни соли 2026 дар доираи барномаи расмии Бонки аврупоии таҷдид ва рушд (БАТР) дар Маъмурияти Минтақаи озоди иқтисодии «Суғд» чорабинии машврати бо иштироки намояндагон, роҳбарият ва субъектҳои МОИ «Суғд» баргузор гардид.

Бо сухани ифтитоҳӣ муовини Маъмурияти МОИ «Суғд» Нуруллозода Зафарҷон баромад намуда, ҳамаи иштирокчиёнро хайрамақдам гуфт ва ба намояндагони Бонки аврупоии таҷдид ва рушд (БАТР) ба шахсияти ҷаноби Холгер Вифел изҳори сипос кард. Нуруллозода Зафарҷон махсусан таъкид намуд, ки БАТР аз рузҳои аввали фаъолият ба Маъмурияти МОИ «Суғд» дар рушди МОИ «Суғд» ёрии амали расонидааст. Ҳамчунин вай қайд намуд, ки бонк ҳамеша ташаббусҳои МОИ-ро дастгирӣ карда вохӯрии имрӯзаро тасдиқи суханаш шуморида суханро ба ҷаноби Холгер Вифел супурд.

Дар навбати худ, роҳбари БАТР дар Тоҷикистон ҷаноби Холгер Вифел аз ҳамаи иштирокчиён барои иштирок изҳори сипос намуда, нақши муҳими ин чорабини дар дастгирии соҳибкорӣ ва тиҷорат дар маҷмӯъ қайд кард.

Дар рафти чорабинӣ намояндагони БАТР Мустафо Ҷонмамадов, Муҳаммад Додабоев, Гавҳархон Мамадҷонова, Назарбегим Гулмамадова ва Рафиқҷон Акилов презентатсияи муфассалро, оид ба хизматрасониҳо ва имкониятҳои бонки, оид ба лоиҳаҳои ҷорӣ ва дурнамои БАТР-ро дар Тоҷикистон пурра инъикос менамояд, ба иштирокчиён пешниҳод намуданд.

Инчунин дар ин чорабини бо намояндагӣ аз Ҷамъияти дорои масъулияти маҳдуди «Фартуна Ко» Умаров М. оид ба таҷрибаи ҳамкори бо БАТР баромад намуд, ки дар байни иштирокчиён таваҷҷуҳи махсусро ба худ ҷалб кард. Презентатсияи Умаров М. ба таври равшан нишон дод, ки БАТР на танҳо ҳамкори молиявӣ, балки шарики боэътимоди стратегӣ дар рушди устувори бизнес ва тиҷорат мебошад.

Ҳамин тариқ, чорабинии иттилоотӣ дар формати фазои ҳамкорӣ ва табодули афкор баргузор гардид.

 

 

 

Санаҳои 18,19-уми июни соли 2026 Роҳбарияти Маъмурияти МОИ “Суғд” ва субъектҳои минтақа дар Намоишгоҳ, Форуми ХII байналмилалии савдо ва сармоягузории «Суғд-2026”, ки дар Қасри варзиши шаҳри Хуҷанд баргузор гардид, иштироки фаъолона дошта, молу маҳсулоти хешро пешкаши бинандагон намуданд.

Иттилоъ дода мешавад, ки дар форуми байналмилалӣ зиёда аз 500 намоянда аз 20 кишвари хориҷӣ дуру наздик ширкат дошта, зиёда аз 200 корхонаву ташкилотҳои ватаниву хориҷӣ молу маҳсулоти худро ба намоиш гузошта буданд. Боиси ифтихор аст, ки чун ҳамасола Роҳбарияти Маъмурияти МОИ “Суғд” якҷо бо субъекҳои фаъоли худ дар намоишгоҳи болозикр ширкат меварзанд ва дар намоишгоҳи имсола низ субъектҳои МОИ “Суғд” аз ҷумла: ҶДММ КМ ТТ “Силкоат Бойя”, ҶДММ КФ “Фортуна Ко”, ҶДММ КМ ТТ “Арча мебел”, ҶДММ “Стар Пласт” ва ҶДММ “Сайр Суғд” иштироки фаъол карда, молу маҳсулоти истеҳсолнамудаи худро ба меҳмонон муаррифӣ намуданд.

Дар ҳошияи форум Роҳбарият ва кормандони Маъмурияти МОИ “Суғд” бо якчанд сармоягузорон ва намояндагони доираҳои соҳибкорӣ мулоқоту гуфтушунидҳо анҷом дода, ҷиҳати татбиқи лоиҳаҳои нави сармоягузорӣ ва густариши ҳамкориҳои мутақобилан судманд мубодилаи афкор намудан.