ТАШРИФИ СОҲИБКОРОНИ ҶУМҲУРИИ МАРДУМИИ ЧИН БА МОИ «СУҒД»
Дар доираи густариши ҳамкориҳои иқтисодиву сармоягузорӣ ба Минтақаи озоди иқтисодии «Суғд» гурӯҳи соҳибкорон аз Ҷумҳурии Мардумии Чин ташриф оварданд.
Меҳмононро Роҳбарияти Маъмурияти МОИ “Суғд” дар маҷлисгоҳи Маъмурият қабул намуданд. Ҳамзамон доир ба фаъолият ва имтиёзу имкониятҳои МОИ “Суғд” ба ҳайати меҳмонон тариқи муаррифинамоӣ (Презентасия) маълумот дода шуд.
Ҳайати меҳмонон аз ширкатҳои истеҳсолкунандаи аккумуляторҳои барқӣ ва бетони тайёр барои сохтмон буда, бо имкониятҳои сармоягузорӣ, инфрасохтор ва шароити мусоиди фаъолияти соҳибкорӣ дар МОИ «Суғд» аз наздик шинос шуда, аз субъектҳои минтақа: ҶДММ “Реал” ва ҶДММ “Стар пласт” дидан намуданд.
Зимни мулоқот масъалаҳои роҳандозии ҳамкориҳои мутақобилан судманд, татбиқи лоиҳаҳои муштарак, таъсиси иқтидорҳои нави истеҳсолӣ ва ҷалби сармояи хориҷӣ мавриди баррасӣ қарор гирифтанд.
Таъкид гардид, ки Маъмурияти МОИ «Суғд» барои сармоягузорони хориҷӣ тамоми шароити заруриро фароҳам оварда, омода аст дар татбиқи лоиҳаҳои истеҳсолии нав ҳамкории ҳамаҷониба намояд.
