• 18.07.201905.08.2019

Боздиди намояндагони ВАО-и ҷуҳурӣ аз МОИ «Суғд»

Рӯзноманигорони телвизион, радио ва рӯзномаҳои ҷумҳуриявӣ аз минтақаҳои озоди иқтисодии кишвар боздид намуданд. Боздид аз ҷониби Вазорати рушди иқтисод ва савдои ҶТ ташкил карда шуда, мақсад аз намоиши дастовардҳои даҳсола ва нави фаъолияти минтақаҳои озоди мамлакат иборат буд.

18 июли соли ҷорӣ, рӯзноманигорон ба МОИ “Суғд” ташриф оварданд. Нахустин субъекте, ки аз он дидан намуданд корхонаи истеҳсоли бозичиаҳои бачагона – Ариана Метал Пласт буд, ки моҳи октябри 2018 сол расман ифтитоҳ гардидааст. Айни замон корхона бо истеҳсоли дучархаҳои бачагона, фойтунчаҳо, погардак, мошиначаҳо, ҷувздонҳои пластикӣ, ки давра ба давра ҷои маҳсулоти хитоиро дар бозорҳо гирифтаистодаанд, машғул аст. Дар нимсолаи якуми соли ҷорӣ, дар ин корхона маҳсулот дар ҳаҷми 8 млн. сомонӣ истеҳсол карда шуд. Аз рӯи гуфтаи роҳбари корхона Дилором Умарова, ширкати Ариана Метал Пласт бо натиҷаҳои бадастовардашуда қаноатманд нест. Бо мақсади гуногункунии маҷмӯи маҳсулоти истеҳсолшаванда, корхона азми истеҳсоли маснуоти пластикии гуногуни рӯзғорро кардааст.

Баъд аз он рӯзноманигорон аз корхонаи истеҳсоли локу ранги Силкоат бойя дидан намуданд. Дар корхонаи муштараки тоҷикӣ –туркӣ зиёда аз 120 хелҳои гуногуни локу ранг барои ороиши берун ва дохили бино истеҳсол карда мешаванд. Маҳсулоти корхона на танҳо дар бозорҳои дохили кишвар фурӯхта мешавад, балки ба мамлакатҳои Осиёи Марказӣ низ содирот карда мешавад. Дар айни ҳол гуфтушунид доир ба содироти маҳсулоти корхона ба қаламрави Россия рафта истодааст.

Инчунин намояндагони ВАО ба субъекти дигари МОИ “Суғд”, корхонаи истеҳсолкунандаи профилҳои дару тирезаи пластикии Равзана Пластик ташриф оварданд. Роҳбари ширкати мазкур Илҳом Сангин оид ба таърихи ташкилёбӣ, дастовардҳо ва дурнамои Равзана Пластик, ки ба ояндаи МОИ бовар карда буд, сухан намуд. Имрӯзҳо корхона тадриҷан маҳсулои худро зери тамғаи миллии MANZIL ба бозорҳои маҳаллӣ бароварда истодааст.

Охирин манзили боздиди рӯзноманигорон корхонаҳои Арча ва Арча Мебел буд, ки дар соҳаи коркарди чӯб дар Тоҷикистон пешқадам ҳисобида мешаванд. Рӯзноманигорон аз намоишгоҳҳои ин ду корхона дидан намуданд, ки аз дару тирезаҳои чӯбӣ, мебел барои муассисаҳои мактабӣ, бемористон ва бинои идораву ташкилот, мебел барои хона ва ғайра иборат буд.

Маҳсулоти корхона чандин бор ба унвони маҳсулоти сол сазовор гаштааст. Роҳбари раёсати корхона Нарзулло Дадобоев ба рӯзгоманигорон оид ба стратегияи рушд ва нақшаҳои ояндаи корхона маълумот дод. 

22 июл боздиди намояндагони ВАО дар вилояти Хатлон, МОИ “Данғара” идома меёбад.

• 04.07.201905.08.2019

Дар МОИ «Суғд» истеҳсоли асали аз лиҳози экологӣ тоза ба роҳ монда мешавад

Дар даҳаи охири моҳи июн тасдиқномаи мақоми субъекти МОИ ба ширкати канадагӣ – Хантана Канада Inc. супорида шуд, ки ҳамчун филиал дар ҳудуди минтақа бо фаъолият машғул хоҳад шуд.

Фаъолияти ширкат ба коркарди сифатноки асал, бастабандӣ ва содироти он, тавассути истифодаи таҷҳизоти замонавӣ равона карда мешавад.

Раванди истеҳсолӣ дар коргоҳи хурди махсус, ки дар он таҷҳизот ва лавозимотҳои муосир васлу насб карда шудаанд ба роҳ монда мешавад. Баъд аз тоза кардани асал аз омехтаҳо, маҳсули тозакардашуда ба зарфҳои шишагии ҳаҷмашон 80 мл то 700 мл ва зарфҳои махсуси хурди 7-10 грамма ҷой дода мешавад. Ширкат бо мақсади васеъ намудани маҷмӯи маҳсулот, истеҳсоли асалро бо омехтаҳои гуногуни тароватбахшанда ба нақша гирифтааст.

Маблағи сармоягузории корхона зиёда аз 500 ҳазор доллари ИМА арзёбӣ шудааст, ки аз ҳисоби маблағҳои худии сармоягузори канадагӣ маблағгузорӣ карда мешаванд.

Дар доираи лоиҳаи мазкур, маҳсулоти тайёр ба бозорҳои ИМА, Канада, Арабистони Саудӣ, АМА, кишварҳои Иттиҳоди Аврупо аз лиҳози он ки ин давлатҳо бузургтарин воридкунандаи асал мебошанд, содирот карда мешавад. Маҳсулоти корхона барои қонеъ гардонидани эҳтиёҷи аҳолӣ, тарабхонаҳо, қаҳвахона ва марказҳои табобатӣ нигаронида мешавад.

Хомашё – асали табиӣ буда, аз асалпарварони маҳаллӣ, ки бо онҳо шартномаи пешакӣ баста шудааст, харидорӣ карда мешавад. Зарфҳо ва тамғақоғазҳо барои бастабандӣ аз ширкатҳои чинӣ ва туркӣ харидорӣ карда мешаванд. Дар сурати зиёд гаштани ҳаҷми содирот, ширкати истеҳсол кардани зарфҳои шишагии худро ба нақша гирифтааст.

Корхона азми истеҳсоли маҳсулотро аз соли оянда дорад ва то соли 2021 ҳаҷми маҳсулотро ба 55 тонна дар як сол расонданист. Дар корхонаи хурди истеҳсоли зиёда аз 20 ҷойҳои кории доимӣ ташкил карда мешавад.

• 14.06.201905.08.2019

Иштироки МОИ “Суғд” дар Форуми байналмилалии сармоягузории «Кӯлоб-2019»

Форуми байналмилалии сармоягузории «Кӯлоб-2019» санаи 14 июни соли ҷорӣ дар шаҳри Кӯлоби вилояти Хатлон баргузор гардид

Дар кори форум доираҳои соҳибкорию сармоягузории ватанӣ ва хориҷӣ, намояндагони мақомотҳои давлатӣ, шарикони рушд, мутахассисон ва коршиносони соҳа иштирок варзиданд.

Дар чорчӯбаи форум намоиши молу маҳсулоти истеҳсолкардаи хоҷагии халқ ташкил карда шуд, ки дар он молу маҳсулоти субъектҳои минтақаҳои озоди иқтисодии кишвар, аз ҷумла МОИ “Суғд” ба намоиш гузошта шуд.

Чор нишасти панелӣ кори форумро давом доданд. Яке аз чунин нишастҳо ба мавзӯи “Минтақаҳои озоди иқтисодӣ ҳамчун омили суръатбахши саноаткунонии ҶТ” бахшида шуда буд, ки дар он роҳбари Маъмурияти МОИ “Суғд” Олимзода Фирдавс баромад намуда, оид ба дастовардҳо ва муаммоҳои пешбурди фаъолияти МОИ ҳамчун тавсия ба ташкилкунандагони минтақаи озоди иқтисодии навташкилшудаи “Кӯлоб” дар қатори роҳбарони дигар минтақаҳои озоди мамлакат суханронӣ намуд.

• 07.06.201905.08.2019

МОИ “Суғд” шарики баргузории конфронси байналмилалии илмӣ-амалӣ

7-8 июни соли ҷорӣ, дар шаҳри Хуҷанд Конфронси байналмилалии илмӣ-амалӣ дар мавзӯи “Вусъати рақобатнокии иқтисодиёти миллии Ҷумҳурии Тоҷикистон дар шароити ҷаҳонишавӣ” баргузор гардид. Чорабинӣ ба 30 солагии Истиқлоияти давлатӣ ва амалисозии 4 ҳадафи стратегияи миллӣ оид ба саноатикунонии босуръати Тоҷикистон бахшида шуда буд.

Чорабинии мазкур аз тарафи Донишкадаи иқтисод ва савдои Донишгоҳи давлатии тиҷорати Тоҷикистон дар ш. Хуҷанд бо дастгирии Мақомоти иҷроияи ҳокимияти давлатии вилояти Суғд, МОИ “Суғд” ва Барномаи рушди СММ ташкил карда шуд.

Дар конфронс намояндагони доираҳои соҳибкорию сармоягузорӣ, донишҷӯён ва устодони донишгоҳҳои ватанӣ ва меҳмонони хориҷӣ аз Ҷумҳуриҳои Ӯзбекистон, Булғория ва Россия иштирок варзиданд. Намояндагони Маъмурият ва субъектҳои МОИ “Суғд” низ фаъолона иштирок намуданд.

Рӯзи нахустини конфронс дар намуди ҷаласаи умумӣ гузашт, ки дар он маърӯзаҳо ва баромадҳои иштирокчиён дар мавзӯҳои нақши бизнес-асотсиятсияҳо дар рушди соҳибкорӣ, марказҳои коворкинг ва нақши онҳо дар пешбурди кори стартапҳо, саҳми хизматрасониҳои бонкӣ ба рақобатпазирии тиҷорат, мавқеи муассисаҳои илмӣ дар тарбияи соҳибкорон, ҷанбаҳои ҳуқуқии асосҳои конститутсионӣ дар фаъолияти соҳибкории дар якчанд давлатҳои аъзои созмони ҳамкории Шанхай шунида шуданд

Мудири шӯъбаи муносибатҳои байналмилалӣ ва ҷалби сармоягузории Маъиурияти МОИ “Суғд” Мирзоён Мирзоманон низ баромад намуда, оид ба аҳамиятнокии истифодабарии иқтидори минтақаҳои озоди кишвар дар саноаткунонии мамлакат ва дар ҳамин замина баланд бардоштани рақобатпазирии соҳаи саноат дар шароити ҷаҳонишавӣ сухан намуд.

Рӯзи дуюми чорабинӣ, аз рӯи барномаи конфронс бо нишастҳои алоҳида вобаста ба мавзӯҳои махсус ва соҳавӣ давом меёбад.

• 28.05.2019

Таъсиси боз як субъекти нав дар МОИ “Суғд”

Санаи 6 майи соли ҷорӣ, Комиссияи махсуси Вазорати рушди иқтисод ва савдои Ҷумҳурии Тоҷикистон оид ба баррасии лоиҳаҳои сармоягузорӣ, амалисозии лоиҳаи истеҳсоли профилҳои пластикиро дар ҳудуди минтақаи озоди иқтисодии “Суғд” қабул намуд. Маблағи сармоягузории лоиҳа 5,5 млн сомонӣ (қариб 580 ҳазор доллари ИМА) мебошад.

Лоиҳа аз ҷониби довталаб барои гирифтани мақоми субъекти МОИ, корхонаи тоҷикӣ-туркии “Афранг Пластик”, ки ифтитоҳи он ба моҳи сентябри соли 2019 пешбинӣ шудааст, пешниҳод гардид. Масоҳати корхона, ки аз 1468 м2 иборат мегардад, дар он истеҳсоли 350 тонна профилҳои ПВХ дар як сол ба нақша гирифта шудааст, ки ин нишондод 30% ҳаҷми умумии лоиҳавиро дар бар мегирад. Корхона ба кор даровардани иқтидори умумии ҳаҷми истеҳсолиро то соли 2021 ба 1200 тонна дар як сол расонданист.

Нархи рақобатпазири маҳсулоти сифатноки корхона имконияти натанҳо таъмин намудани бозори дохилиро дода, нчунин ба кишварҳои ҳамҷавор, аз ҷумлаАфғонистон, Қирғизистон, Қазоқистон ва Ӯзбекистон содирот карда мешаванд.

Дар корхона таҷҳизоти истеҳсолии замонавӣ ва навтарин насб карда шуда, дар он 28 нафар сокинони маҳаллӣ бо ҷои кори доимӣ таъмин мегарданд.

Санаи 14 апрел дар Маъмурияти МОИ “Суғд” тасдиқномаи мақоми субъект ба директори корхона расман супорида шуд. Роҳбари Маъмурияти Олимзода Фирдавс ба намояндаи корхона муваффақият ва дастовардҳои беназирро таманно намуд.

• 24.05.201905.08.2019

Ташрифи ҳайати кории Бонки Осиёии Рушд

24 майи соли ҷорӣ, ҳайати кории Бонки Осиёии Рушд таҳти роҳбарии бахши ҳамкории иқтисодии байниминтақавии Осиёи Марказӣ (ҲИБОМ) ҷаноби Гуолианг ВУ ба минтақаи озоди иқтисодии “Суғд” ташриф оварданд, ки ҳайати меҳмононро муовини Раиси вилояти Суғд Анвар Яъқубӣ ҳамраҳӣ намуд.

Ҳайати БОР дар доираи ҳадафи нахустини худ оид ба расонидани кӯмаки техникӣ ба долони иқтисодии «Тоҷикистан-Ӯзбекистон-Қазоқистон» ба вилояти Суғд ташриф овард.   

Дар оғози боздиди худ, меҳмонон аз корхонаи истеҳсолии минтақа – Ариана Метал Пласт, Арча ва  Арча мебел шинос гардида, маҳсулоти корхонаҳоро бо баҳои баланд арзёбӣ намуданд.

Баъдан дар толори маҷлисгоҳи ширкати коркарди чӯбу тахта “Арча” аз фаъолияти минтақаи озод тариқи руёна маълумот гирифтанд, ки дар он роҳбари Маъмурияти МОИ “Суғд” Олимзода Фирдавс оид ба афзалиятҳо ва сабукиҳои пешкашкунандаи минтақа ба соҳибкорону сармоягузорон сухан намуд.

Дар рафти вохӯрӣ, инчунин маълумот оид ба лоиҳаҳои рушди МОИ, аз ҷумла лоиҳаи сохтмони хати роҳи оҳани Спитамен – МОИ «Суғд» – Истиқлол ба меҳмонон дода шуд. Муовини Раиси вилояти Суғд Анвар Яъқубӣ ба меҳмонон доир ба аҳамиятнокии лоиҳа ҷиҳати пешбурд ва баланд бардоштани иқтисоди вилоят маълумот пешкаш намуд, ки аз ҷониби роҳбари ҳайати кории БОР аҳамиятнокии сохтмони лоиҳаи мазкур дар рушди муносибатҳои иқтисодии байни кишварҳои минтақаи Осиёи Марказӣ таъкид карда шуд.

Хотиррасон мешавем, ки Бонки Осиёии Рушд дастгирӣ намудани лоиҳаро тавассути гузаронидани корҳои тадқиқотӣ барои таҳияи лоиҳаи асосноккунии техникӣ-иқтисодӣ изҳор намудааст.

• 21.02.2019

Баррасии натиҷаҳои фаҳолияти солона дар нишасти матбуотӣ

7-уми феврали соли ҷорӣ, дар Маъмурияти МОИ “Суғд” нишасти матбуотӣ бо иштироки намояндагони ВАО-и вилояти Суғд баргузор гардид.

Роҳбари Маҳмурият Фирдавс Олимзода оид ба ҷамъбасти фаҳолияти минтақа дар соли 2018 ҳисобот дода, аз накшаҳо ва самтҳои асосии рушд барои соли 2019 маълумот дод.

То имрӯз 24 субҳектҳои МОИ “Суғд” аз имтиёзҳо ва афзалиятҳои фароҳамовардашуда истифода мебаранд. “Соли ҷорӣ, дар нақша дорем шумораи умумии субҳектҳоро ба 30 адад расонем”, – қайд намуд Ф.Олимзода.

Дар соли 2018 ду корхонаҳои бузург бо иштироки Президенти кишвар мӯҳтарам Эмомалӣ Раҳмон ифтитоҳ гардиданд.

Корхонаи муштараки тоҷикӣ-туркии «Арча-Мебел», навъҳои гуногуни мебелро истеҳсол карда, ба сохтмони он 9 миллион сомонӣ сармоягузорӣ карда шудааст. Ҳамчунин, корхонаи истеҳсолии маҳсулоти металлу пластикии “Ариана Металл Пласт” ба кор оғоз намуд. Корхонаи мазкур аллакай бо истеҳсоли мошинчаҳои кӯдакона, фойтунча, дучарха ва пойгардак машғул аст.

Дар оянда ширкат, номгӯи маҳсулотро зиёд намуда, нақша дорад адади онҳоро ба 36 намуд хелҳои гуногуни маҳсулот, аз ҷумла таҷҳизоти маишӣ ва қисмҳои эҳтиётии автомобилҳо аз металл ва пластмасса зиёд намояд. 

Ин корхона аз ҷониби соҳибкорони ватанӣ таъсис дода шуда, ба сохтмони он беш аз 14 миллион сомонӣ сармоягузорӣ карда шудааст.

Дар рафти омодагӣ барои кушодани корхонаҳо дар ҳудуди МОИ, корҳои сохтмонӣ ва ободонӣ, аз ҷумла мумфаршкунии роҳ, чарогонкунӣ, шинонидани ниҳолҳои ҳамешасабз, васлу насби шиору овезаҳо  гузаронида шудаад. Айни замон корҳои сохтмонии бинои маъмурӣ идома дорад.

Дар нишасти матбуотӣ, нишондиҳандаҳои оморӣ дар давраи ҳисоботӣ, ки тамоюли рушди мусбӣ доранд нишон дода шуданд.

Тибқи иттилои Фирдавс Олимозода ҳаҷми истеҳсолот дар соли 2018 ба 116 миллион сомонӣ баробар гардид, ки ин нишондиҳанда нисбати соли 2017 ба маблағи 36 миллион сомонӣ зиёд аст. Молу маҳсулот дар минтақа истеҳсолшуда ба кишварҳои ҳамсоя, Қирғизистон, Ӯзбекистон, Туркманистон ва Афғонистон содирот карда шуда, ҳаҷми содирот ба 17 миллион сомонӣ баробар гардид.

Дар соли 2018 ҳаҷми сармоягузории субҳектҳо ба17 миллион сомонӣ баробар гардид. Дар МОИ “Суғд” зиёда аз 500 ҷойҳои корӣ ташкил карда шудааст. Дар рафти нишаст оид ба нишондиҳандаҳои субҳектҳо оид ба андози иҷтимоӣ ва андоз аз даромад ва пардохтҳои гумрукӣ ба буҷаи давлат низ маълумот дода шуд.

Соли 2018, бахшида ба 10-даҳсолагии таъсисёбии минтақаҳои озоди иқтисодӣ дар Тоҷикистон, Маъмурияти МОИ “Суғд” бо дастгирии Вазорати рушди иқтисод ва савдои Ҷумҳурии Тоҷикистон, Мақомоти иҷроияи ҳокимияти давлатии вилояти Суғд ва шарикони рушд Форуми байналмилалии иқтисодии «Суғд-2018» ташкил намуд, ки дар он шахсони алоҳида, ки ба рушди МОИ дар Тоҷикистон саҳми назаррас гузоштаанд, мукофотонида шуданд.

Маълум гардид, ки Маъмурияти МОИ “Суғд” бо минтақаҳои озоди Қазоқистон, Қирғизистон, Ӯзбекистон, Беларус ва Хитой ҳамкорӣ менамояд. Ҳамчунин қайд гардид, ки МОИ “Суғд” созишномаҳо ва ёддоштҳои тафоҳуми ҳамкориро бо ташкилотҳои байналмилалӣ, бо мақсади ҷалби сармоягузорӣ ба лоиҳаҳои рушд ба имзо расонидааст.

Ф.Олимзода дар хотимаи суханронии худ қайд намуд, ки Маъмурияти МОИ “Суғд” ҷиҳати расидан ба ҳадафҳои дар назди худ гузоштааш ҳаматарафа кӯшиш хоҳад намуд.

Баъд аз анҷоми нишаст, намояндагони васоити ахбор ба саволҳои худ посухи мушаххас гирифтанд.

• 21.02.2019

Дар МОИ “Суғд” истеҳсоли филузҳои рехтаи оҳанин роҳ монда мешавад

21 декабри соли 2018 дар ҷаласаи Комиссия Вазорати рушди иқтисод ва савдо доир ба баррасии  бизнес-нақшаҳо ва лоиҳаҳои самоягузории довталабон барои гирифтани тасдиқномаи мақоми Субъекти минтақаҳои озоди иқтисодӣ лоиҳаи ҶДММ “Оҳанкор” баррасӣ гардида, ташкили истеҳсоли филузҳои металли сиёҳ дар минтақаи озоди иқтисодии “Суғд” тасдиқ карда шуд.

Ширкат ба нақша гирифтааст, ки соли оянда истеҳсолотро ба роҳ монад. Сармоягузор нақша дорад, ки ба истеҳсолот бештар аз 1.8 миллион доллари ИМА маблағгузорӣ намояд.

Мавриди йайд аст, ки ин корхона аввалин субъекти “Суғд”, ки аз ҷониби сармоягузорони Ӯзбекистон ташкил карда мешавад. Дар раванди барқарорсозии муносибатҳои иқтисодӣ байни кишварҳои Ӯзбекистон ва Тоҷикистон, ин амал саривақт арзёбӣ мегардад.

Лоиҳаи сохтмони бинои коргоҳ замонавӣ пешбини шуда, фаъолияти он ба коркарди дуюмдараҷаи металлҳои сиёҳ равона карда мешавад.

Раванди истеҳсолот бо таҷҳизоти замонавӣ ба роҳ монда мешавад, ки он аз ҷиҳати экологӣ тоза ва бехатар аст.

Филузҳои металлӣ барои коркарди минбаъда ба Ҷумҳурии Ӯзбекистон содир карда мешаванд.

Ҳадафи лоиҳа аз қонеъ намудани талаботи бозори минтақа ба ашёи хом иборат аст.

Дар раванди омӯзиши бозор, корхона ният дорад, ки намуди маҳсулотро тақвият диҳад.

Илова бар истеҳсоли филузҳои оҳанӣ, номгӯи маҳсулот ба арматураҳо, профилҳои металлӣ,блокҳо ва ғайра зиёд карда мешавад.

22 декабри соли ҷорӣ, дар Маъмурияти МОИ «Суғд» муаррифии тантанавиии субъекти нав сурат гирифта, ба корхонаи нав Тасдиқнома тақдим карда шуд.

Роҳбари Маъмурияти МОИ “Суғд” Фирдавс Олимзода ба ширкати нав муваффақиятҳо ва комёбиҳои навро таманно намуд.

• 21.01.201913.02.2019

Иштироки МОИ «Суғд» дар Анҷумани байналмилалии блокчейн 2019

Санаҳои 21-23 январи соли ҷорӣ, дар шаҳри Саняи музофоти Хайнани Ҷумҳурии Халқии Чин Анҷумани васеи байналмилалии блокчейн 2019 баргузор гардид.

Мақсади асосии чорабинӣ муҳокимаи равандҳои татбиқи блокчейн дар кишварҳое, ки соҳаи мазкур тараққӣ накардааст, иборат буд. Дар муддати се рӯз, масъалаҳои марбути мавзӯи чорабинӣ, аз ҷумла қонунгузорӣ, ҷоригардонӣ ва ояндаи соҳа баррасӣ гардидаанд.

Бояд қайд намуд, ки блокчейн дар пешбурди самтҳои гуногуни иқтисодиёти кишварҳои мутаррақии ҷаҳон рушд карда, аллакай аз ҷониби ширкатҳои бонуфуз ба монанди IBM, JPMorgan Chase, Microsoft, Visa ва Intel истифода бурда мешавад.

Анҷуман аз тарафи Парки саноатию иттилоотии Хайнан дар ҳамкорӣ бо ҳукумати он ташкил карда шуд.

Дар чорабинӣ садҳо нафар иштирокчиён, аз ҷумла сармоягузорон, сиёсатмадорон, роҳбарони ширкатҳои тиҷоратӣ, доираҳои илмӣ аз Амрико, Осиёву Аврупо, инчунин Осиёи Марказӣ иштирок варзиданд.

Дар кори чорабинӣ Роҳбари Маъмурияти МОИ “Суғд” Фирдавс Олимзода низ фаъолона иштирок намуд.

Намояндагони кишварҳои иштирокчӣ дар бораи татбиқи блокчей дар кишварҳои худ, нақши он дар пешбурди иқтисодиёт, махсусан дар рушди тиҷорат андешаҳои худро баён намуданд.

Инчунин соҳибкорони ИМА, оиди таҷрибаи муваффаққонаи истифодабарии блокчейн дар соҳаҳои мухталифи хоҷагии халқ,махсусан парвариши чорвои шохдор маърӯза карданд.

Фирдавс Олимзода дар баромади худ доир ба фаъолияти минтақаҳои озоди иқтисодии Тоҷикистон сухан карда, аз ҷумла қайд намуд, ки МОИ дар мамлакат барои ҳамчун платформаи амалигардонӣ ва санҷиши фаъолияти инноватсионӣ таъсис дода шуда, аллакай таклифҳои лоиҳавии татбиқи низоми блокчейн, аз ҷумла истеҳсоли асъори криптӣ аз ҷониби ширкатҳои гуногуни ин соҳа пешниҳод гардидаанд.Ҷумҳурии Тоҷикистон, ки ҳамеша ба низому техналогияҳои ҷадид ва муосир сиёсати дарҳои кушодро пеша кардааст дар мавриди блокчейн аввал омӯзиши амиқи таҷрибаи давлаҳои ҳамсояро таклиф кардааст..

Инчунин, иштирокчиён дар асоси барнома, аз ширкатҳои пешрафтаи музофоти Хайнан, махсусан минтақаи озоди тиҷоратии ин минтақа дидан намуданд.

Дар интиҳои Анҷуман байни кишварьои иштирокчӣ созишномаҳои бисёрҷониба ба имзо расонида шуданд.

Ҳамин тариқ, Маъмурияти МОИ ”Суғд“ ёддошти тафоҳум бо Парки саноатию иттилоотии Хайнан оид ба ҳамкориҳои мутақобилаи муфид, аз ҷумла ифтитоҳи намояндагии МОИ ва толори намоишгоҳ бо мақсади пешбурди молу маҳсулоти Тоҷикистон ба имзо расонида шуд, ки аз ҷониби парк онҳо барои истифодабарии ройгон ба мӯҳлати як сол дода шуданд.

• 24.10.201813.02.2019

Дар МОИ «Суғд» боз як корхонаи истеҳсолӣ расман ифтитоҳ гардид

Санаи 24 октябри соли ҷорӣ, субъекти МОИ “Суғд” – ҶСК «Ариана Метал Пласт», ки бо истеҳсоли ашёи металлӣ-пластикӣ машғул аст, расман ба фаъолият шурӯъ намуд. Маросими кушодашавии корхона бо иштироки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон баргузор сурат гирифт.

Корхона истеҳсоли бозичаҳои бачагонаро, аз ҷумла мошиначаҳо, дучарха, сечарха, фойтунча ва погардакро оғоз намуд. Минбаъд низ бо мурури пешрафти корхона, маҷмӯи маҳсулоти он ба 36 намуд анвоъи гуногуни маҳсулот зиёд карда мешавад, ки аз ашёи рӯзғор, шабодакунакҳо, қисмҳои эҳтиётӣ барои нақлиёт ва техникаи маишӣ аз пластмасса иборат аст.

Ҳашт хатҳои технологӣ имконияти истеҳсоли маҳсулоти сифатноки аз лиҳози экологӣ бехатарро дода, ҳаҷми истеҳсолӣ зиёда аз 20 млн. сомониро дар як сол ташкил медиҳад.

Корхонаи бузурги саноатӣ майдони 4 гектарро дар ҳудуди МОИ “Суғд” ишғол карда, дорои якчанд коргоҳҳои истеҳсолӣ, бинои маъмурӣ ва анбор мебошад. Корхонаи мазкур аз тарафи соҳибкорони ватанӣ Алишер ва Мирзо Умаровҳо таъсис дода шуда, маблағи сармоягузории он аз 14 млн. сомонӣ зиёд аст.
Кор дар ҷамъияти номбурда дар ду баст ба роҳ монда шуда, ҳамаи коргарони он пеш аз оғози фаъолият курсҳои махсуси омӯзиширо гузаштаанд. Айни замон дар корхона 100 нафар бо ҷои кори доимӣ таъмин буда, аз сокинони ш. Хуҷанд ва шаҳракҳои гирду атрофи он иборатанд. Баъд аз ба коранандозии хати истеҳсолии нав боз 50 нафар бо ҷои корӣ таъмин карда мешаванд.

Ашёи хоми мавриди истифодабарӣ қароргирифта қисман аз хориҷа, аз ҷумла Хитой ва Эрон ворид карда мешаванд. Аз рӯи ақидаи мутахассисони соҳа, ин аввалин корхонае мебошад, ки ҳама қисмҳои бозичаҳо, дучархаи бачагона ва техникаи маишӣ дар дохили кишвар истеҳсол карда мешаванд. Корхона азм дорад, ки на танҳо бозори қаламрави мамлакатро бо маҳсулоти худ таъмин намояд, балки ба Қазоқистон, Қирғизистон, Россия ва Афғонистон низ содирот кунад.

Пешвои миллат баъд аз шиносоӣ аз раванди фаъолияти корхона, ба роҳбарияти он барои дастгирии сиёсати созандандаи Ҳукумати Ҷумҳурии Тоҷикистон баҳои баланд дода, ба онҳо чунин дастур доданд, ки сараввал ба сифати маҳсулоти истеҳсолшаванда аҳамияти ҷиддӣ зоҳир намоянд. Зеро маҳз сифатнокии маҳсулот метавонад боиси рақобатпазирии молу маҳсулот дар бозорҳои маҳаллӣ ва берун аз мамлакат гардад.