Шӯъбаи иттилоот

• 18.06.2021

Супоридани Тасдиқнома ба субъекти нави МОИ «Суғд» ҶДММ “Суғдиёна Агро”

Санаи 16 июни соли ҷорӣ, дар ҷаласаи Комиссия Вазорати рушди иқтисод ва савдои Ҷумҳурии Тоҷикистон доир ба баррасии бизнес-нақшаҳо ва лоиҳаҳои самоягузории довталабон барои гирифтани тасдиқномаи мақоми субъекти минтақаҳои озоди иқтисодӣ лоиҳаи ҶДММ “Суғдиёна Агро” баррасӣ гардида, ташкили истеҳсоли басту банд ва коркарди меваи хушк дар ҳудуди МОИ “Суғд” тасдиқ карда шуд.

Ҳадафи лоиҳа таъсиси корхонаи истеҳсолӣ бо истифодаи технологияҳои муосир ҷиҳати коркард ва бастубанди писта, чормағз ва кешю мебошад.

Мавриди зикр аст, ки корхонаи мазкур дуюмин субъекти МОИ «Суғд» ба ҳисоб меравад, ки аз ҷониби сармоягузорони кишвари ҳамҷавори ба мо дӯст-Ӯзбекистон ташкил карда шудааст.

Лоиҳаи корхонаи истеҳсолӣ бо ҷалби сармоягузории беш аз 500 ҳазор доллари ИМА амалӣ карда шуда, раванди истеҳсолот бо истифодаи таҷҳизоти замонавӣ ва услубҳои коркарди аз лиҳози экологӣ бехавф ба роҳ монда мешавад. Ҳамчунин баъд аз оғози фаъолият зиёда аз 25 ҷойҳои нави корӣ ташкил карда мешаванд.

Аз рӯи гуфтаи масъулини корхона, маҳсулоти тайёри ҶДММ «Суғдиёна Агро» ба бозорҳои кишварҳои ИДМ содир карда шуда, ба роҳандозии содирот ба кишварҳои Аврупо низ дар оянда ба нақша гирифта шудааст.

Санаи 18 июни соли ҷорӣ, дар бинои Маъмурияти МОИ «Суғд» маросими супоридани Тасдиқномаи мақоми субъект ба корхонаи навтаъсис баргузор гардид. Роҳбари Маъмурият Камолиддинзода И. ба роҳбарияти субъекти нав муваффақият ва дастовардҳои бузургро таманно намуд.

• 15.06.202115.06.2021

Сафарҳои омӯзиши кормандони литсейҳои касбии техникӣ ба корхонаҳои саноатии МОИ «Суғд» тибқи амалишавии Лоиҳаи «Тақвияти таҳсилоти касбӣ-техникӣ ва омӯзиш»

Санаҳои 5 ва 10 июни соли равон дар Минтақаи озоди иқтисодии «Суғд» ташкили сафарҳои омӯзишӣ ба корхонаҳои саноатӣ, бо иштироки омӯзгорони литсейҳои касбӣ, устоҳои таълими истеҳсолӣ, роҳбарони литсейҳои шаҳру ноҳияҳои миқёси ҷумҳурӣ барпо гардид.

Сафари омӯзиши тибқи талаботи Лоиҳаи «Тақвияти таҳсилоти касбӣ-техникӣ ва омӯзиш» ҷонибдори гардида, мақсади асосии он шиносоӣ бо раванди истеҳсолот, технологияҳои муосири саноатӣ ва тақвияти ҳамкори муассисаҳои таълимӣ бо корфармоён, барои кормандони муассисаҳои таълими низоми таьсилоти ибтидоии касбӣ мебошад.

Роҳбари Маъмурият Камолиддинзода И. меҳмононро дар толори маҷлисгоҳ пешвоз гирифта ба иштирокчиён оид ба шарту шароитҳои МОИ «Суғд», имтиёзҳо ва имкониятҳо мавҷуда маълумоти пурра пешниҳод намуд.

Дар навбати худ роҳбари гуруҳи мазкур Бобоев Сангин оид ба ташкил намудани чунин сафарҳои омӯзиши, ҳадафи он ва оид ба Лоиҳаи «Тақвияти таҳсилоти касбӣ-техникӣ ва омӯзиш» ҳарф зад ва дар рафти вохӯри бо иштирокчиён мулоуот гузаронида шуд, ки дар он онҳо ба саволҳои худ посухи мушахас гирифтаанд.

Пас аз муаррифии фаъолияти МОИ «Суғд» тибқи барномаи ташриф, меҳмонон аз якчанд корхонаҳои МОИ «Суғд» дидан намуданд. Меҳмонон аз рафти фаъолият ва истеҳсоли молу маҳсулоти ҶСК “Ариана Металл Пласт”, ҶДММ КМ «Силкоат бойя», ҶДММ КМ ТТ “Таҷпроф”,ҶДММ «Стар пласт» шинос шуда, ба сифати маҳсулу корбарии онҳо баҳои баланд дода, бо роҳбарони коргоҳ оид ба роҳ мондани ҳамкорӣ мувофиқи талабот ҳамсӯҳбат гардидаанд.

Бояд қайд карда шавад, ки Вазорати меҳнат, муҳоҷират ва шуғли аҳоли Ҷумҳурии Тоҷикистон барои татбиқи Лоиҳаи «Тақвияти таҳсилоти касбӣ-техникӣ ва омӯзиш» дар панҷ бахши афзалиятноки иқтисодиёт яъне энергетика, кишоварзӣ, нақлиёт, сохтмон ва сайёҳӣ чунин сафарҳои омӯзиши амали гардонида истодааст.

Инчунин сафарҳои омӯзиши дар корхонаҳои саноатии берун аз МОИ «Суғд» ба ҶСК “Қолинҳои Гулистон”, ҶДММ “Органик Ян” (дар ноҳияи Ҷаббор Расулов), ҶДММ “Ҷавонӣ”, Нассоҷи Хуҷанд, Корхонаи коркарди гӯшт ҶДММ “Кабири Хуҷанд” ташкил карда шудаанд.

• 02.06.202105.07.2021

Дар арафаи ташкили Форуми соҳибкорон байни ҷомеаи тиҷоратии вилояти Суғд ва намояндагони соҳибкории Ҷумҳурии Ӯзбекистон, намояндагони доираҳои тиҷоратии Ҷумҳурии Ӯзбекистон ба МОИ «Суғд» ташриф оварданд

31 майи соли равон ба МОИ Суғд ҳайати доираҳои тиҷоратӣ аз вилояти Намангони Ҷумҳурии Ӯзбекистон ташриф оварданд.

Вохӯри дар Маъмурияти МОИ «Суғд» сурат гирифта дар он самтҳои ҳамкориҳои дуҷониба муҳокима карда шуданд.

Дар музокирот аз ҷониби Эшматов Ҷавохир – сардори шуъбаи муносибатҳои байналмилалӣ презентатсия дар бораи Минтақаи озоди иқтисодии “Суғд” ироа карда шуд.

Дар натиҷаи муаррифӣ, ҷонибҳо ба муҳокимаи масъалаҳои мавриди таваҷҷӯҳи ҳарду тараф гузаштанд.

Дар ҷараёни мулоқот меҳмонон ба як қатор корхонаҳои ҳудуди МОИ «Суғд» ташриф оварда, бо маҳсулоти истеҳсолшуда ошно шуданд.

• 19.03.2021

Ҷашни байналмилалии Навруз муборак!

Маъмурияти минтақаи озоди иқтисодии «Суғд» бо арзи эҳтироми беандоза Шумо ба муносибати фарорасии иди баҳор ва меъроси ниёгон – Наврӯзи оламафрӯз табрику таҳният гуфта, ба Шумо умри бардавом, хушбахтии беинтиҳо, саломатии қавӣ, хонаи обод ва дар фаъолияти пурсамари давлатиатон бурдбориҳо таманно дорад.

Бигзор Наврӯз бо манзалати бузурги ҷаҳониаш, бо русуми аждодиаш, қалбатонро пурнур, шаҳомати бахтро фаровон, ранҷуриҳоро сарнагун ва шукуфтанҳои мақсудро бароятон мушарраф гардонад.

Наврӯзатон муборак!

• 17.02.202119.02.2021

Ҷамъбасти натиҷаҳои фаъолияти МОИ “Суғд” дар соли 2020

Санаи 17 феврали соли ҷорӣ дар бинои Маъмурияти МОИ “Суғд” нишасти матбуотӣ доир ба натиҷаҳои фаъолияти минтақа дар соли сипаришуда баргузор гардид, ки дар он роҳбари Маъмурият Камолиддинзода Илёссиддин ба намояндагони ВАО-и маҳаллӣ оид ба дастовардҳои МОИ, бо назардошти номусоидиҳои соли гузашта маълумот дод.
Дар соли 2020, новобаста аз пандемияи сирояти COVID-19 нишондиҳандаҳои фаъолияти истеҳсолии субъектҳои МОИ “Суғд” тамоюли рушд дошданд. Масалан, ҳаҷми маҳсулоти истеҳсолшуда дар соли 2019 маблағи 167,5 млн сомониро ташкил дода, соли гузашта ин нишондиҳанда ба 169,8 млн сомонӣ баробар гардид, ки то як андоза зиёд аст. Дар ин давра ҳаҷми содирот ва пардохтҳо ба буҷети давлатӣ низ дар қатори истеҳсолот афзуданд.
Ба гуфтаи роҳбари Маъмурият, соли ҷорӣ ба масъалаи ҷалби сармоягузорӣ ва ташкили корхонаҳои нав таваҷҷӯҳи хоса зоҳир карда шуда, корбарӣ дар ин самт боз ҳам мустаҳкамтар карда мешавад. Чи тавре, ки таъкид гардид, айни замон Маъмурият бо якчанд довталабони МОИ гуфтушуниди пешакӣ доир ба таъсиси корхонаҳо дорад, ки сирояти COVID-19-и соли гузашта ба пешрафти он гуфтушунидҳо монеа эҷод намуд.
Айни замон корҳои сохтмонӣ дар субъектҳои навтаъсис ва ободонии ҳудуди МОИ идома дорад. Ифтитоҳи расмии якчанд иқтидорҳои истеҳсолӣ ба ҷашни 30 солагии Истиқлолияти кишвар пешбинӣ шудааст, ки оғози фаъолияти онҳо ба тавсеаи нишондиҳандаҳои умумии фаъолияти МОИ, бо назардошти ташкили ҷойҳои навӣ корӣ, такони ҷиддӣ мебахшад.
Дар интиҳои нишасти матбуотӣ рӯзноманигорон ба яке аз субъектҳои фаъоли МОИ “Суғд” – ҶСК “Ариана Метал Пласт” ташриф оварда, аз фаъолият ва молу маҳсулоти он аз наздик шинос шуданд.

• 15.02.202115.02.2021

Акнун андозаи иҷораи замин дар МОИ “Суғд” ду маротиба кам шуд!

Аз 1-уми январи соли 2021, арзиши иҷрораи замин барои сармоягузорон ва субъектҳои амалкунандаи МОИ “Суғд” ду маротиба кам гардид. Минбаъд андозаи арзиши иҷораи замин барои 1 метри мураббаъ $0,50 (50 сенти ИМА) барои 1 сол ташкил медиҳад. Пештар ин андоза 1 доллари ИМА-ро ташкил медод.

Хуш омадед ба МОИ “Суғд”!

• 30.01.202101.02.2021

Ташрифи Сафири Фаронса ба МОИ “Суғд”

Санаи 30 январи соли ҷорӣ, Сафири Фавқулода ва Мухтори Фаронса дар Тоҷикистон ҷаноби Мишел Тарран ба МОИ “Суғд” дар доираи сафари расмии худ ба вилояти Суғд ташриф овард. Ин нахустин сафари ӯ ба вилояти Суғд мебошад, ки баъд аз таин шудан ба ҷои собиқ сафири Фаронса хонума Ясмин Гуедар анҷом дод.
Дар оғози вохӯрӣ муовини якуми роҳбари Маъмурияти МОИ “Суғд” Сӯҳроб Зикриёзода меҳмононро хайра мақдам гуфта, нақши МОИ-ро дар рушди иқтисодиёти Тоҷикистон қайд намуд.
Баъдан, Мирзоманон Мирзоён – муовини роҳбари Маъмурият дар бораи фаъолияти минтақаи озоди иқтисодии “Суғд” дар намуди рӯнамо маърӯза кард.
Пас аз муаррифии фаъолияти МОИ, ҷонибҳо ба муҳокимаи масъалаҳои мавриди таваҷҷӯҳ гузаштанд.
Пас аз вохӯрӣ, тибқи барномаи ташриф меҳмонон аз якчанд корхонаҳои МОИ дидан намуданд. Ҷаноби Мишел Тарран аз фаъолият ва молу маҳсулоти ҶСК “Ариана Металл Пласт”, ҶДММ КМ ТТ Фортуна-Кo”, ҶДММ КМ ТТ “Таҷпроф” шинос шуда, ба сифати онҳо баҳои баланд дод.
Пас аз боздид қарор оид ба таҳкими минбаъдаи ҳамкориҳои мутақобилан судманд, аз ҷумла пешниҳоди иттилоот дар бораи афзалиятҳо ва имтиёзҳои МОИ “Суғд” ба доираҳои сощибкорию сармоягузории Фаронса ва ҷустқҷӯи имкониятҳои муаррифии молу маҳсулоти субъектҳои МОИ дар намоишҳои молу маҳсулоти Тоҷикистон дар Фаронса қабул карда шуд.

• 24.11.202024.11.2020

Маъмурияти МОИ “Суғд” бахшида ба рӯзи Парчами давлатӣ

Муссалам аст, ки 24-уми ноябр мардуми шарафманди Тоҷикистон Рӯзи парчами давлатиро таҷлил менамоянд. Аз ин рӯ, дар баробари Суруди миллӣ, Нишони давлатӣ ва забони модарӣ Парчами давлатӣ, низ барои мардум муқаддас аст. Агар забон қалби миллат бошад, Парчамро метавон сари баланди халқ номид, зеро ҳар ҷо парчам афрохта шавад, мардуми кишвар бо сари баланд ба сӯи он менигаранд ва дар вуҷудашон ифтихори ватандорӣ дучанд эҳсос мегардад.

         Бо ибтикори Асосгузори сулҳу ваҳдати миллӣ, Пешвои милат,  Президенти Ҷумҳурии Тоҷикистон мӯҳтарам Эмомалӣ Раҳмон, рӯзи 24-уми ноябр ҳамчун рӯзи Парчами давлатии Ҷумҳурии Тоҷикистон дар кишвар таҷил карда мешавад. Таҷлили бошукӯҳи ин ҷашн метавонад дар замири ҳар як фарди ватандӯст ва ҳар як сокини тоҷикистони азиз ифтихори ватандориро дучанд менамояд. Парчам ифтихор ва сарбаландии миллат мебошад. Таърихи  навини давлатдори тоҷикон шоҳиди он аст,ки Парчам ва бузургдошти он барои ҳар сокини мамлакат муқаддас буда ,ба шарофати партавафшонии Парчам мардум мауттаҳид мегарданд.

         Бори дигар Рӯзи Парчами давлатӣ муборак ҳамкорони азиз!

• 18.11.2020

Дар МОИ «Суғд» боз як субъекти нав ба қайд гирифта шуд

17 ноябри соли 2020 дар ҳудуди МОИ «Суғд» боз як корхонаи нав, ки бо истеҳсоли зарфҳои коғазӣ машғул мегардад ба қайд гирифта шуда, тасдиқномаи мақоми субъект супорида шуд.

Фаъолияти асосии ҶДММ “Покзарф” ба истеҳсоли зарфҳои коғазӣ барои маҳсулоти намудҳои гуногуни хӯрокворӣ равона карда шудааст. Барои истеҳсоли маҳсулоти коғазӣ таҷҳизот ва технологияҳои навтарин истифода бурда мешаванд. Маҳсулоти истеҳсолшуда пурра ба стандартҳои байналмилалии сифат ҷавобгӯ буда, аз ҷиҳати экологӣ тоза безарар мебошад.

Корхона фаъолияти истеҳсолиро дар ҳудуди 500 м² амалӣ намуда, зиёд намудани ҳудуди истеҳсолиро дар оянда ба нақша гирифтааст.

Иқтидори истеҳсолӣ 9000 дона дар як соат ташкил дода, иқтидори истеҳсолӣ аз ин миқдор зиёд мебошад.

Ширкат ният дорад, ки маҷмӯи маҳсулоти худро афзоиш дода, истеҳсоли намудҳои гуногуни зарфҳоро барои нӯшокиҳои газнок, афшураҳо ва коктейлҳо, чой, қаҳва, патароқ(попкорн), яхмос ва дигар хӯрокҳои тезпаз (фастфуд) ба роҳ монад.

Корхона фурӯши маҳсулотро дар Тоҷикистон ба роҳ монда, азми ба роҳ мондани содироти маҳсулотро ба кишварҳои ҳамсоя, аз қабили Ӯзбакистон, Қирғизистон, Қазоқистон ва Афғонистон дар оянда дорад.

Ёдовар мешавем, ки айни замон дар МОИ «Суғд» 30 субъект ба қайд  гирифта шудааст.